Rut 3 | TVK | STEP | Vatei, Noume biteni mi Rut bitene, “Havuxahin, bos xa nikamet tiramue tova tengan muliteli e ilaxat kuh xouk.

Ruth 3

Noume Pol ni Suse tengan Rut Vahur Rilomun ni Tiramue Tova

1 Vatei, Noume biteni mi Rut bitene, “Havuxahin, bos xa nikamet tiramue tova tengan muliteli e ilaxat kuh xouk. 2 ?Onem xat Boas, moletin xa di otepol tetel atou te polien nan xil? Xi nggo vatimol na tiramue naralu xalu. Ma uteong kuhi, xosali mahis, xi iha ihas rerat utut bale ra valite. 3 Ma uha uxul, using ihos e uhas ti vokon e xouk. Ti, uhe von polien nan, e onapol ni ti xa xi nakila xa xouk ode rute ak. Utatil melele xa xi ianien e imu ti uaen ivus 4 e upus xat kuh rute xa xi ha ipat en. Melele xa xi ipor vovong, uha ulat kutei man e ha upat uting xat kaelen tengan ipisen ni xa usisi tengan ilaxat kuh rin xil nam. Ti, xi sung ihit naha xa xouk upol ni.”

5 Rut bit rilomun ni mini bitene, “Inou nipol vuol ni neta xil vus xa obiteni minou tengan nipol ni.”

6 Ma Rut be von polien na Boas, e pol ni nggoni ngan xa tova nan tehiteni mini. 7 Melele xa Boas ngganien e mu uaen bus, xi milonge bos. Di, be visal seri tetit bale xa mitihu di e ba pat. Melele xa xi por vovong, Rut mika merou ba, milat kutei man e ba pat miting xat kaelen.

8 E hilaep te vongien, Boas mesep ni neta tei. E melele xa mea biles, pusi xa atou tei di pat e di miting xat kaelen. 9 Ma misisi bit, “?Ei, xouk visi?”

E Rut bit rilomun ni mini bit, “Inou Rut li tang, atou te polien nam. Suv, xouk obe tei e vatimol na tiramue navan xa mat tuei. Misak ni, nggusil sexien namim xil, xouk iaxa ulaxat kuh rin xil navan, e ukila uhur nou mei nihe atou nam.”

10 E Boas bit rilomun ni mini bit, “Rut, Iahova ituxol xatuk. Di opisen sexien xa bos mi vatimol namem xil xa be eilep mak mu mili naha xa di opisen ni mi tova nam xa be tunau namem. Xouk, vongite xa ova olang ni tiram maxoe sav tova ngamu, ngan xa holesok nan holu mu ngan xa holesok nan tovuol, e xouk otapol ni ti. 11 Ma xouk onanem ti nahe holu usil naha xa istal. Inou nipol vuol ni holesok xil xa otsis nou ven tengan nilaxat rin xil nam vengan xa xouk obe atou tei xa moletin xil vus lapus kil hosien nam. 12 Reitin mak xa inou nabe ngan xa ilaxat kuh rin nam xil vengan xa nabe vatimol xati na tiramue nam xa temat e nakila nihuruk e nilaxatuk. E moletin tei mun de vatimol namem xa xi mak mu be sangas ni tiramue nam, e xi mikila itiamu ni nou tengan ihuruk e ilaxat rin xil nam. E xos ien ti navei, ma inou sung nipol ni. 13 E vongien ak, bos xa uta tak. Ti, sangas ut ilan, ma ralikameti e ralikila xa xi en ihei tengan ilaxatuk mu en ti navei. Xos en ihei, ma bos, e xos en ti navei, ma inou nabiteni reitin pe met Iahova xa inou sung, nihuruk e ti nilaxatuk. E vongien ak, upat uta tak ituxoh makoe.”

14 Ma Rut pat miting xat kaelen duxoh makoe. E makoe roroh tamu, xi mitamea tengan vaha, vengan xa Boas ien ti tavei moletin xil lakila xa atou tei temei tepat e von polien ak. 15 E diamu xa bit vaha, Boas biteni mini bitene, “Hur rat kot nam e uten ni itak.” Melele xa Rut miteni, Boas mirang utut bale xa kilo nen duxoh hanutap tei e hexalu mun (30 kg) ba en. Di, dutou ni po rati de vatuvun e Rut poe dilomun be tim. E Boas, xi be metimal.

16 Melele xa Rut duxoh tim, tova nan misisi bit, “?Havuxahin midep?”

Ma Rut bit vuol ni holesok xil xa Boas biteni mini. 17 E Rut biteni mun mini bitene, “E xi ien ti tavei xa heok vaka hon melele xa nadilomun namei tim mei napusuk, ma misa utut bale xil ak xa kilo nen be hanutap tei e hexalu mun (30 kg) minou.”

18 Noume bit rilomun ni mini bitene, “Onanexo ti. Utatili tengan upus ti xa rin ak istal itep, vengan xa Boas misakras vangel ha vuma ... imal ni rin xil vus nam.”